Bie Jeudenlapke

 

Tammo Pottenkieker

Teutje, mien vraauwmìns is n boetenlansker, stamt oaf van de Kaninefoaten. Lu bint hail aans as wie Grunnegers, ze waiten noamelek nait van lichten en swoaren. Teutje het din ook n echte Kaninefoatenkop, nait alle latjes in t hekje, t vet wil boven drieven, zo kin ik nog wel even deur goan. Nou goud...k wil hoeshollen ook nait bie t pad brengen mor ik beleef t ain en t aander mit heur, denk wel ais wat heb ik vrouger misdoan dak dit mout mitmoaken...

 

t Gebeurde op Teutjes joargdag, een dag om n kander swiet laif te hebben, mor dat luip hail aans. Ik as Joris Goudbloud wol der n biezundere dag van moaken, t minste wat je din doun kinnen is n bloumke. De verkoopster, n jong snötwicht, vruig wat veurn soort vraauwmìns Teutje was...denn
een bloumke mos aigenleks bie t karakter van de vraauw pazen...Ik gaf heur vot geliek, zunder noa te denken zee ik...dou mor n kaktus.

 

Ik docht dak het goud doan haar mor wat n ellende hebt wie had. t Ging haard om haard over en weer, om t weer recht te braaien stelde ik heur veur om aankommende zoaterdag bie Jeudenlapke wat schier ondergoud aan te schaffen, toun haar ik heur vot weer op t lientje. Wie noar Jeudenlapke tou...wie wazzen der in joaren nait west, wat het dij kerel der n nijmootse neren van kregen.
n Swiet uithangbordje nuigt joe nor binnen.

„Bist ter bie of bist ter nait bie mit Sam zien lingerie."

 

Je magt nait meer zeggen ondergoud, das nou lingerie. Ik zeg tegen Sam „hou komst op zo'n spreuk kerel." Sam schudde mit kop en zee „dij is van Sheakspiere." Ik zeg „ schier van dij Sheakspiere das t dat bordje even lainen magst." Wie waart nog mor net binnen werren we overrompeld mit n meziekje...

„Tjing tjang tjoedeltje wat jeukt mien knoedeltje."

Ik zeg „ wat een noflek deuntje Sam, wel is dij laller" „Oh" zegt Sam „das mien man Moos."

Ik zeg tegen Teutje „Sam is oet de kast komm." zegt Teutje „ wat mos hai din in dij kaast."

Nou ik zèg joe,t...dat binnen nou Kaninefoaten, wat heb ik vrouger misdoan.

„Dat komt goud oet dat je vandoag kommen" zegt Sam. „Je hebt gelok." De buustholder is vandoag joareg...600 joar... Ik zeg „ gefelicitaaierd, ik wil die nait veur de kop steuten, mor wie komt aigenleks veur n nije." „Dat hebt wie"“ zegt Sam, wie hebt het nijste van t nijste...de push up BH." (volgnde moal verder, din gaait Teutje de BH aanpazen.)

Grouten

Tammo