Kerst 2014

Teutje mien vraauw

 

De rare ideeën van de dorpsdirigent...kerstdinner 2014

Zo as ik al zee ons wicht is traauwd mit n Chinees, nou mag ik aale Chinezen wel mor ons schoonzeun nèt nait. Hai liekt ook nait op n Chinees...plotseg dik, nou Chinezen bint over t algemain nait zo dik, veuraal as je dij wichtertjes bekieken in n Chinees restaurant.

Teutje en ik goan voak keer noar Duutsland, we wonen vlak bie de grìns, din is dat mor n wip.

We maggen der ook groag n keer hìngoan, n oetje zeg mor. Wie nemen din ook altied wat mit veur t wicht, t gaait mie welles te vèr mor je hebt ja mor ain wicht. Teutje is din ook aal aan t snuustern veur ons wicht en vanzulm veur dij leutje rötjong dij ze hebben. Ik mag aal kinder groad lieden mor dat jong nèt nait. Hai is nog mor vief joar mor roare meneuvels woar je nait goud van worren.

t Wicht vruig ons dizze keer of we even wat vlèzzen wien alsook spruten konnen mitnemen, veuraal n eend dij binnen in Duutsland veul goudkoper...oh joa... omreden we toch deur polder reden nog even wat kedovvels bie boer vot. We hebben nog n sjeesboane veur leutje jong kocht en zo haren we ons dag weer had.

t Wicht vruig ons of we din eerste kerstdag bie heur kwammen eten. Vanzulm mos dat deurgoan,

swiet mooi ja, zo as je mit kinder omgoan. Je wilt ja gain ellende dat zai je overal ja en we hebben zulm vrouger genog beleefd ons ollen van weerskanten waren schaaiden en dat gaait altied mit ellende gepoard...is t nait din. t Wicht vruig of ze van pa even €200,- kon lainen denn ze stonnen n pietske rood. Teutje zee dat het wel goud kwam ze zol pa wel even bewaarken om zien knipke oet buuts te hoalen.

t Was din zovèr... eerste kerstdag. Teutje haar zug apmoal optut, we mozzen om nommedag der hìn. We waren amper binnen kwam dat rötjong der al aanstoeven..."Oma Oma wat ben je mooi“...ik zeg „opa din“...Hai keek mie aan „ opa heeft pyama aan.“ Ze begonnen apmoal te schoatern van t lachen. „Vief joar“ zee t wicht, Teutje zee, nog slap van t lachen „woar hoalde t weg hè.“ We zaten nog mor amper kreeg ik n kotsebaale tegen kop aan, wat haar t jong n lol..."Opa is gek“ zee der ook nog, ze mossen apmoal weer lachen. t Wicht zegt „ Fang, zo hait ons schoonzeun, is boven zuch an t aanklaiden dij komt zo. Ik dee mien mond al open mor Teutje was nèt even eerder, zo kreeg ik n trap tegen mien enkel aan, dat dut gloepens zeer, t ainegste wat je doun is n maal gezicht trekken van de piene.

Deurbèlle ging, der kwammen nog twij vrunden van schoonzeun, oet DenHoag. Ik bin gain rascist mor k heb n gloepens hekel aan Hollanders mit heur hoog Hoarlemmerdiekse proaterij. Dat rötjong apmoal overstuur, wupte as n dollemansmìns deur de koamer. Even rusteg zitten was der nait bie, ik kin nait tegen aal dij drokte. Teutje keek mie aan mit n blik van doe holst die de bek...doar kwam meneer de Chinees ook aan van boven apmoal in t pak. Hai weegt wel 100 kilo, kwaabt van t vet. As Teutje en hai hìnploffen hebben ze der in Loppersum last van. „"Goedendag Tang“ zee der...hai nuimt Teutje Tang, tegen mie zee der „Hallo Bang van Tang.“ Nou das n binnenkommer nait. We kregen apmoal n bakje leut en konden din ‚aan tafel’ zo as ze dat nuimen.

Teutje en ik bie mekoar dat rötjong tegenover mie, doar noast ons wicht en de heren an aander kaante van toavel. Teutje haar proaterij mit t wicht over heur klaid en mor aal vuilen aan t stof. t Was zo’n mooie stof en woar ze dat kocht haar. Nou nait bie de Zeebra dat kon ik ter wel oet opmoaken.

De heren mit heur mooie pakken haren t over voetballen. Ik vin alle soorten sport mooi mor voetballen kin mie gestolen blieven. Zo zat ik allint mit dat rötjong opscheept. Toavel was in twij dailen opdekt, ik vruig mie oaf wat dat zol betaiken. t Wicht ston op, luip nor de keuken, kwam mit n schoal spruten...nou ik lus alles mor gain spruten. De twijde schoal waren peren. Ze kinnen mie alles veurschurreln mor gain peren...as ik t spul al zai. I kreeg vanzulm weer n beste trap tegen mien enkels aan van Teutje, dat dut gloepens zeer kin ik joe vertellen. De grote verassen was de eend...nou ik lus alles mor gain eend...zo as dat dair doar ook bie lag dut mie de rillens over rogge lopen. Dat rötjong zegt ook nog „waar zit de kop mamma?“ Ik kon wel over mien nek goan. Pa mouten ie ook soep? Ik zeg joa è...n kopke soep gaait ter wel in, komt ze mie aan mit tomatensoep...nou ik lus alles mor net gain tomatensoep. Teutje keek mie aan mit n poar ogen in de kop, din kin je de rest wel roaden. Dat spul glee mie deur de ströt as schuurpapier.

t Wicht ging weer noar keuken, kwam mit nassi veur de heren...man man...nassi vin ik t lekkerste van de wereld. Ze kwam mit schoaltjes saté, kroepoek en t kon nait op...soep van de haaien en dij Chinese vruchten, wat zag dat ter apmoal lekker oet...kwiele luip mie om bek. Fatsoun hollen haar Teutje mie inschuunt en wat mout je din...blift ja niks aans over. Eet smakelijk zeden ze...Teutje gaf mie n trap tegen enkels, dat dut gloepens zeer kin ik joe vertellen. De heren konnen al begunnen mor wie mozzen nog even wachten op kedovvels, dij zaten nog in de oven...waren nog net nait kloar. Dat rötjong begon mit de spruten te speulen, vrat ze aan en gooide ze ook weer in schoal zo waren aale spruten al aanvreten.

De heren waren aan t smakken en mor over voetballen proaten zegt dij aine tegen mie „ wat is uw favoriete voetballer meneer“ „Abe lenstra mienjong“ nou de haile toavel begon te schudden van t lachen. „ Opa is gek“ heurde ik van aander kaant toavel. t Wicht weer in t ìnde en woarachteg de kedovvels waren kloar, as je dat din mengen mit de kòle spruten din kin dat nèt. Ik kin joe vertellen dat het leven op leeftied nait mitvaalt.

We gingen mit n kander in koamer zitten, kwam dat jong op mie oaf mit n papiertje „kan opa voorlezen...wat staat daar?“ Ik zeg „ nou dat zal opa wel even voorlezen...er staat...dat jij een stoute jongen bent.“ Ik haar ja nait kinnen oanen wat dat veur gevolgen zollen hebben, begunt mie dat rötjong te blèren...blèrde de haile noaberschop bie mekoar...zegt t wicht „wat heb je nou doan, dat dou je toch nait.“ Ik docht... zie zo... doar bin ik n ogenblik van oaf. Ze keken mie apmoal aan, ik docht Teutje zal wel van mie oaf goan.

Mien schoonzeun kreeg in de kop dat de kerstman zo wel zol kommen en woarachteg even loater bonzde der aine tegen t roam aan, dat rötjong was alles al weer vergeten. Opa mos mit hom boetendeur kieken woar kerstman was, in dij tied konnen de vraauwlu de kadootjes onder boom leggen. Nou toun was het groot feest. Het eerst kado was n oape...Ik kon mie nog heugen dat Teutje €50,- mos hebben veur dat kring. Het twijde kado was n sjeesboane of opa dat even in mekoar kon zetten. Ik mos dus op knijen in keuken, kreeg n puut vol rommel...nou k vin alles goud mor n kaaste van Ikea of sjeesboane wordt mie gek genog. Ik kreeg vanzulm weer n dovvel van Teutje en doar zat ik allint in keuken de rest haar t over voetballen. Noa veul wurgen haar ik dat ding din inmekoar en toun kwammen de heren der mit speulen. Ik zèg tegen Teutje „kom aan, we mouten mor op hoes oaf.“ Ropt t wicht „ nee è...wie kriegen nog n borrel en ousters“ Nou ik bin al tien joar van draank oaf, ze kinnen mie alles veurzetten mor gain ousters.Teutje schopte mie tegen enkels aan, ik kin joe vertellen dat het gloepens zeer dut...nou vooruit din... twij ousters din...k bin hoast over mien nek goan.

We gingen weg, luiten de kinder allaine, want ollu mouten vroug op bère. Ik zeg tegen Teutje in auto “as ik dat aal zo oetreken din hebben we ons aigen eten betoald, ze zoepen mien wien op en de kadootjes hebben we ook betoald.“ We hebben ze nog n kerstkadoo geven van 200 euro

want dat gèld zai k ook nooit weer en wat heb ik der van? Twij blaauwe enkels en pien in tlief van de spruten. „ Tammo doe moust ophollen te jammern, wat mouten die kinder din...oetmekoar goan...wolst dij hoesholden vernailen. t Is kerstmis Tammo...

Groutnis

Tammo