Logboek deel 147

Wadlopen met Tjoam

Een tijdsbeeld van de voorstelling 'olwiefkenijs' mitsgaders de rare ideën van een gepensioneerde dorpsdirigent.

Olwiefkenijs over mien kameroad Tjoam (in het Grunnegs)

Tjoam is oet tied kommen, haar k al vertèld ja...din komt joe alles boven van vrouger. t Was n beste vìnt, zat gain kwoad in mor ook gain steveghaid. Je maggen t woord hail nait bruken mor t was aigenliek n lamlul. Hai wol n keer wadlopen, is haildal niks aan moar Tjoam wol onbedenkt wadlopen. Alzo we gingen noar Paiterboeren denn doar kin je wadlopen, hier ook wel achter diek mor t is ja nijmoods om mit n kander mit aandere malloten doar in Paiterboeren deur te sliek te klaauwen.

Nou doar stonnen we din in Paiterboeren, t waren doar apmoal Duutsers t leek wel of wie de ainegste Grunnegers waren. Je mout joe aanmelden, kost ook nog n beste stuver, aans mag je nait sliekjetreden. Vroagt dij kerel, ik bedoul dij wadloper-aanvoerder, wèl n flotske Duuts kon. Tjoam keek mie aan en vanzulm mos ik dij ‚Poepen’ oetstokken wat dij flaauwekul aaltemoal inholde. Ik zeg: „Wissen Sie wat Wad is, ze keken mie aan of t’in Keulen dunderde.“ Nou doar ston je din mit joen goud gedrag. Ik zeg: „ Kiek doar is n diek“ ik swaaide mit mien aarms richten diek om dat goud oet te duden. Ik zèg: "achter diek ist ain gröten zee, Sie kennen diese zee von Junge komm bald wieder...Jung is nog aal vot, of en tou is de zee ook vot en din blift sliek over, op t sliek kunnen Sie wandeln en dat hait Wadwandeln. Of en tou komt de zee zurück en din mouten Sie machen dat Sie votkommen aans bezouven sie sich." Aal kloar ze keken mie roar aan mor ze begrepen mie wel è.

Schier in Paiterboeren doar è...aal zeehonden. Moust kieken zee Tjoam doar ligt ook aine tussen mit aarms en bainen. Ik zeg "wel okkerdebok das Lenie...kist hoast gain verschil zain." Lenie was aan t hoelen ze haar drokte had op dij zeehondenbarreltje. Ik zeg "kop op Lenie gon mor mit ons mit wadwadeln...n flotske frisse wind deur t hoar." "Joa" ropt ze "mag Klazien ook mit"...Ik zeg "wel is Klazien din"..."oet Zalk...Klazien oet Zalk dij krudenvraauw." Ik zeg "dij is toch al laank oet tied. "Joa" ropt Lenie "ze het net de wederopstanding mitmoakt deur aal dij kruden vamzulm."

De zee was wied weg en wie kont begunnen mit sliekjelopen. Ik zeg tegen de Poepen „Wie kunnen anfangen è“ Doar haren ze wel oren noar en doar scheet t hìn. Dij kerel dij de barrel laaidde zee nog tegen mie moust de Poepen goud vertellen wat ze doun mouten aans kint wel ains mislopen. Dus ik zèg: „Sie mussen goud luustern nor de Wadführer aans gaait t mis.“

De Wadfürher haar ain oog...ik zeg: „Hou is t kommen.“ Hai zegt: "van de zeekoapen"...Ik zeg "man t ging der goud eer zeker." "Joa" zegde "dij vogels kinnen joe aanvaaln en pikken joe ogen oet kop, mor je huiven nait baangschietern, as ik roup... vogels bukken... din mout je joe bukken, din gebeurt ter niks"...Ik zeg tegen de Poepen: „Onze Wadführer hat ein Auge, das kommt von vögeln, passiert niks è. Wenn de Wadführer ruft... vögeln boeken... dann passiert niks, also aal kloar. Ze keken mie zo vremd aan mor ze haren, mout je mor reken, t wel begrepen è.

Ik ruip nog: De Wadführer macht nog einen probe, wenn er bölkt „Vögeln Boeken“ din mout je joe boeken und dann passiert niks...also aal kloar.“ Opains ropt de Wadführer „Vögeln Boeken“ en èlk boekte zuch. Komt Tjoam apmoal overstuur bie mie..."hèst doe dat zain?“ Ik zèg „nee.“

„Klazien het zuch boekt en ze hèt gain underboxem aan.“ Ik zeg „Sag bloos...mout dij krudentoentje zeker n flotske zeelucht hebben.“

Tjoam zegt: „As zai zuch weer boekt din snap ik heur“...Ik snapte der niks van, mor ja...Tjoam is ja n flotske appaart. Opains ropt dij kerel „Vögeln Boeken“ en Tjoam nemt mie doar n roam...

Zègt Lenie tegen Klazien..."merk oe dat niet Klazien.“ ...“Joawel è“ zegt Klazien „mor k heb laiver datter aine wipt as mie der n oog oetpikt.“ en zo haren Tjoam en ik nog n schiere dag.

Grouten

Tammo