Teutje heur nije buustholder

Teutje mien sukerpopke...n bèk as n biel

 

 

Grunnegers

 

 

 

t Begon op schoul eerste klas,

kop wer joe keert, omstoan leert.

Mous wer boerenkool,miegen een plas

t zol nooit meer worren zo as t was.

We lalnde t wilhelmus, oranje boven

t Grunnegs laid wer nait doan.

We leerde boegen, de keunegin loven

mor ome Loeks zaggen ze nait stoan

t Grunnegs gaait verdwienen,

körtbainen kinn‚t nait meer verstoan.

Wat te doun, t is om te grienen.

t Is aal geven wordt niks terugdoan.

Ze trekken ons nog aal deur de sliek.

Ze denken t is de Grunnegers nègeliek

mor t zit daip...ons verdrait.

t Ainegste holvast is ons Grunnegs laid.

Teutje de kaninefoat was lèst joareg. Ik geef der niks om mor dat volk lot dat nait ongemuid. Ze moakt ter n hail spektoakel van, mit drommen kommen ze der op oaf...zo van in Grunnen vaalt wat te hoalen. t Is altied n rib oet mien lief.
Mor goud ik docht n bloumke...Turelletoantje of zo...Zegt dij verkoopster turelletoantjes hebben we nait, wat mout t din wezen.
Ik zeg nou?... dou mor n kaktus...Wat heb k door n drokte om had. Ik zeg tegen Teutje: "We wilt gain drokte è we goan zoaterdag noar Jeudenlapke veur wat schier ondergoud"...Toun haar k heur weer op t lientje...

Wie derop oaf...Jeudenlapke...wat n schiere neren, we waren der in tieds tieden nait wèst. t´Is ook gain ondergoud meer t is nou lingerie.

Ook n swiet oethangbordje...

Bist ter bie of bist ter nait bie

mit Sam zien lingerie.

Ik zeg n swiet bordje Sam, das van Sheakspier zegde. Ik zeg mooi dast dat even bruken magst. Je wordt nuigt mit n deuntje.

Tjing tjang doedeltje

wat jeukt mien knoedeltje

Ik zeg "n schier deuntje Sam, wel lalt dat," "dat dut mien man Moos." Ik zeg "Teutje Sam is oet de kaast kommen." "Wat mos hai din in kaaste." Ik zeg joe,t wat heb ik vrouger toch misdoan dat ik dit mout mitmoaken. Ik kin wel van heur oaf goan mor din wordt ze kwoad.

Sam zegt "komt goud oet dat je vandoag kommen de buustholder is joareg." Ik zeg:"gefelicetaaierd." ...600 joar...Ik zeg: „ik wil die nait veur de kop steuten Sam mor we kommen aigenleks veur n nije."
"Wie hebt het nijste van t nijste" zegt Sam..."de PushUp buusteholder."

Ik zeg Teutje doe most de borsten PusUppen en din de buustholder derom smieten. Zai t hokje in, n gestìn en n lawaai. Ik zeg: "wat dust aal"...poesten en huppen...opains bölkt ze "k heb ze omhoog è woar hest doe dij buustholder"...buustholder weg...Ik zeg "lot mor weer hangen," zat ze derop.

Ik zeg lot mie dij borsten mor omhoog poesten, dat zal die zo pazen zegt ze. Ik zeg nou din hol ik de buustholder wel vast.t Paasde nuver, mor toun mos dat ding van achtern nog vast...Ik zeg lot ze mor weer hangen.

Teutje zegt doe moust achter mie stoan. Ik zeg hou mout ik doar kommen mit dien omvang. Ik zeg „waist wat, we leggen buustholder op grond din kist ter zo instappen"...mor ja heur moarze zat in wége... Ik zeg: „Lot weer hangen, dat wot hom ook nait."

"Waist wat, we doun hom over kop hìn." k Haar t nog mor net zegt ropt jeudenlapke:" Kin je kloarkommen." Ik zeg:"nee." "Din stuur ik t wichtje wel even." Ik zeg hol doe Teutje din even aan de proat.Teutje n kop as n twij kwattjesboeskool. De kop weer glìne...

Bie gelok kwam Sam der overtou mit n kesjèt...Teutje de kaninefoat was weer op droad. k Heb hier n demonstroatie model zegt Sam...bèk vuil mie oet hoaken. "De buusdouk kwam ombie 1400" zegt Sam...Ik zeg "hou komst nou zo gauw bie n buusdouk"..."Joa" zegde..."Ik zag die kwielen."

Teutje kreeg t weer te pakken. t Was ombie 1960 en dat was nou nèt
t joar van de sexuele revolutie. De Platte...plattelandse-vraauwen waren de dolle miena's van t dörp. 1964 de pil. Jongkerels luipen mit haile...haile...laank hoar. Fietse hufden je nait aanschaffen, je pakde mor ain van n aander.

As we dat achteroaf bekieken, wat is t aal veraandert nait, t gaait ook zo haard...1950 muiken we de moarze nog schoon mit krant n papier, toun haar t nijsblad nog nut...1975 kwammen ze mit dubbeloags wc papier, we bruken nou 80 miljoen rollen per dag... in 2004 deden we t mit n vochteg doekje...Nee...Wie doun t thoes nog aal mit n schurrel-douk...Hou ainvoudeg kin het wezen.

Tammo oet Wolndörp